6. ຄະນະໂຄສະນາອົບຮົມແຂວງເປີດກອງປະຊຸມສະຫຼຸບວຽກງານໂຄສະນາອົບຮົມທົ່ວແຂວງຫົວພັນ.

ລາຍລະອຽດ

ສ້າງຂື້ນເມື່ອ ວັນຈັນ, 08 ກຸມພາ 2021 08:29

ຂຽນໂດຍ ຄອຂ ຫົວພັນ

6. ຄະນະໂຄສະນາອົບຮົມແຂວງເປີດກອງປະຊຸມສະຫຼຸບວຽກງານໂຄສະນາອົບຮົມທົ່ວແຂວງຫົວພັນ.

ໃນວັນທີ 5 ກຸມພາ 2021 ຜ່ານມານີ້, ຄະນະໂຄສະນາອົບຮົມແຂວງຫົວພັນ ໄດ້ເປີດກອງປະຊຸມສະຫຼຸບວຽກງານຄະນະໂຄສະນາອົບຮົມທົ່ວແຂວງຫົວພັນປະ​ຈໍາປີ ປີ 2020​ ແລະ ວາງທິດທາງແຜນການ ປີ 2021 ຂຶ້ນທີ່ຫ້ອງປະຊຸມໃຫຍ່ຊັ້ນ V ຫ້ອງວ່າການປົກຄອງແຂວງຫົວພັນ ເປັນເວລາ 1 ວັນ. ພາຍໃຕ້ການເປັນປະທານຂອງທ່ານ ເຜີດ ມາປັນຍາ ຮອງເລຂາຄະນະບໍລິຫານງານພັກແຂວງ, ຜູ້ປະຈໍາການ, ຜູ້ຊີ້ນໍາຂົງເຂດວຽກງານການເມືອງ, ວຽກງານແນວຄິດ - ທິດສະດີ ແລະ ວຽກງານພັກ-ພະນັກງານ ແລະ ການເຂົ້າຮ່ວມຂອງ ທ່ານ ຕົງລິ ເຕັ່ງ ຄະນະກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍຄະນະ, ມີບັນດາຫົວໜ້າ, ຮອງຫົວໜ້າພະແນກການອ້ອມຂ້າງແຂວງ ຜູ້ທີ່ເຮັດວຽກງານການເມືອງ-ແນວຄິດອ້ອມຂ້າງແຂວງ ແລະ ບັນດາເລຂາພັກເມືອງ, ຮອງເລຂາພັກເມືອງຜູ້ຊີ້ນໍາວຽກງານແນວຄິດ-ທິດສະດີຂັ້ນເມືອງ, ຫົວໜ້າ, ຮອງຫົວໜ້າຄະນະໂຄສະນາອົບຮົມເມືອງ ແລະ ພະນັກງານລັດຖະກອນທີ່ສັງກັດຢູ່ໂຄສະນາອົບຮົມແຂວງເຂົ້າຮ່ວມທັງໝົດ 97 ກວ່າຄົນ, ຍິງ 20 ຄົນ.

ກອງປະຊຸມໄດ້ຮັບຟັງການຜ່ານບົດສະຫຼຸບການເຄື່ອນໄຫວວຽກງານໂຄສະນາອົບຮົມ ປະຈໍາປີ 2020 ແລະ ວາງທິດທາງແຜນການປະຈໍາປີ 2021. ທີ່ມີຄວາມໝາຍ ແລະ ຄວາມສໍາຄັນເຊິ່ງພວກເຮົາຈະໄດ້ພ້ອມກັນຍົກສູງຄວາມຮັບຜິດຊອບຕໍ່ກອງປະຊຸມ ແລະ ຈະສຸມໃສ່ບາງວຽກງານດັ່ງນີ້: ຈະໄດ້ພ້ອມກັນຕີລາຄາຄືນໃນການນໍາພາ-ຊີ້ນໍາວຽກງານໂຄສະນາອົບຮົມການເມືອງ-ແນວຄິດ ໃນທົ່ວແຂວງໃນ 1 ປີທີ່ຜ່ານມາເຊິ່ງບົດສະຫຼຸບໄດ້ຕີລາຄາ ດ້ານດີ-ດ້ານອ່ອນ, ສິ່ງຄົງຄ້າງ ແລະ ບົຮຽນທີ່ຖອດຖອນໄດ້ ແລະ ທິດທາງໜ້າທີ່, ການເມືອງ ຂອງວຽກງານໂຄສະນາສຶກສາອົບຮົມການ ເມືອງ-ແນວຄິດໃນປີ 2021; ຈະໄດ້ຮັບຟັງບົດປະກອບຄໍາເຫັນຈາກຄະນະໂຄສະນາອົບຮົມເມືອງບາງເມືອງ; ຜູ້ແທນກອງປະຊຸມຈະໄດ້ພ້ອມກັນປະກອບຄໍາເຫັນໃສ່ບົດສະຫຼຸບ ແລະ ທິດທາງເພື່ອນໍາໄປຈັດຕັ້ງປະຕິບັດຮັບປະກັນທາງປະ ລິມານ ແລະ ຄຸນນະພາບເພື່ອແນໃສ່ໃນການປົດປ່ອຍ 3 ກະແສແນວຄິດ ທີ່ເປັນການກົດໜ່ວງທ່ວງດຶງໃນການສ້າງສາພັດທະນາແຂວງຫົວພັນເວົ້າລວມເວົ້າສະເພາະແມ່ນບັນດາຂະແໜງການ, ທ້ອງຖິ່ນໃນທົ່ວແຂວງໃຫ້ມີການຫັນປ່ຽນທີ່ຕັ້ງໜ້າ, ນໍາພາປະຊາຊົນສ້າງວຽກເຮັດງານທໍາມີອາຊີບທີ່ໝັ້ນຄົງ ແລະ ມີລາຍຮັບທີ່ແນ່ນອນ; ກອງປະຊຸມປະຈໍາປີໃນຄັ້ງນີ້ຄະນະໂຄສະນາອົບຮົມຈະໄດ້ມອບໃບຍ້ອງຍໍປະຈໍາປີ 2020 ນີ້ໃຫ້ບຸກຄົນ ແລະ ການຈັດຕັ້ງທີ່ເຄື່ອນໄຫວພົ້ນເດັ່ນ; ກອງປະຊຸມພວກເຮົາຈະໄດ້ຮັບຟັງຄໍາເຫັນໂອ້ລົມ ຂອງຂັ້ນເທິງເພື່ອຊີ້ທິດເຍືອງທາງໃຫ້ຄະນະພັກ, ແຕ່ລະຂັ້ນນໍາໄປຜັນຂະຫຍາຍເຮັດໃຫ້ມະຕິ, ຄໍາສັ່ງ, ແນວທາງນະໂຍບາຍຂອງພັກ-ລັດ ເປັນຮູບປະທໍາ ສາມາດແກ້ໄຂຄວາມທຸກຍາກຂອງປະຊາຊົນເສີມຂະຫຍາຍຈິດໃຈເພິ່ງຕົນເອງ. ກຸມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ. ຫຼັງຈາກນັ້ນບັນດາທ່ານຜູ້ແທນກອງປະຊຸມຍັງໄດ້ພ້ອມກັນປະກອບຄໍາຄິດຄໍາເຫັນໃສ່ເນື້ອໃນເອກະສານດັ່ງກ່າວ ແລະ ພ້ອມກັນເອ ກະພາບຮັບຮອງເອົາ. ໃນຕອນທ້າຍທ່ານ ຕົງລີ ເຕັ່ງ ຄະນະກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ໄດ້ຂັ້ນມອບໃບຍ້ອງຍໍຂອງທ່ານເຈົ້າແຂວງໃຫ້ແກ່ພະນັກງານ-ລັດຖະກອນ ຜູ້ທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານປະຈໍາສົກປີ 2020 ຂອງຄະນະໂຄສະນາອົບຮົມແຂວງ, ເມືອງ ຈໍານວນ 28 ທ່ານ, ພະແນກການ 1 ພະແນກ, ຍິງ 7 ທ່ານ. ເພື່ອເຮັດໃຫ້ເນື້ອໃນກອງປະຊຸມໄດ້ຮັບການຈັດຕັ້ງປະຕິບັດໃຫ້ເກີດດອກອອກຜົນນັ້ນ ກອງປະ ຊຸມໄດ້ຮັຍຟັງການໂອ້ລົມຈາກ ທ່ານ ເຜີດ ມາປັນຍາ ຮອງເລຂາຄະນະບໍລິຫານງານພັກແຂວງ, ຜູ້ປະຈໍາການ, ຜູ້ຊີ້ນໍາຂົງເຂດວຽກງານການເມືອງ, ວຽກງານແນວຄິດ-ທິດສະດີ ແລະ ວຽກງານພັກ-ພະນັກງານ; ເພື່ອຍົກສູງວຽກງານການ ເມືອງ-ແນວຄິດ ໃຫ້ບັນດາສະຫາຍຖືເອົາວຽກງານການເມືອງ-ແນວຄິດຕິດພັນກັບບັນດາແຜນງານທີ່ສະເໜີຜ່ານໄປນັ້ນ, ໃຫ້ເອົາບັນດາແຜນງານອັນລະອຽດຂອງພວກສະຫາຍເພື່ອນໍາໄປຈັດຕັ້ງປະຕິບັດໃຫ້ເກີດຜົນເປັນຈິງ, ໃນນີ້ຕ້ອງເອົາໃຈ ໃສ່ຕໍ່ກັບການສ້າງ ແລະ ຊີ້ນໍາຕາໜ່າງເພື່ອນຮ່ວມງານມີການເຄື່ອນໄຫວ, ເພື່ອເກັບກໍາສະພາບ-ຫາງສຽງສັງຄົມເພາະມັນເປັນການປົກປ້ອງແນວທາງ, ຕີຖອຍການປັ່ນປ່ວນໃສ່ຮ້າຍປ້າຍສີແນວທາງ ແລະ ບົດບາດການນໍາຂອງພັກເຮົາ.

ກອງປະຊຸມໄດ້ປິດລົງໃນເວລາ 4 ໂມງຂອງວັນດຽວກັນນັ້ນ.

• < ຕໍ່ໄປ
• ຕໍ່ໄປ >