11. ຄະນະໂຄສະນາອົບຮົມແຂວງຫົວພັນ ສໍາເລັດການຝຶກອົບຮົມວຽກງານໂຄສະນາອົບຮົມ - ປາຖະກະຖາ ຢູ່ເມືອງກັວນແຂວງຫົວພັນ.

ສ້າງຂື້ນເມື່ອ ວັນຈັນ, 05 ເມສາ 2021 07:58
ຂຽນໂດຍ ພູສັກ

ຄະນະໂຄສະນາອົບຮົມແຂວງຫົວພັນ ສໍາເລັດການຝຶກອົບຮົມວຽກງານໂຄສະນາອົບຮົມ  - ປາຖະກະຖາ ຢູ່ເມືອງກັວນແຂວງຫົວພັນ.

ໃນມື້ວັນທີ 30 ມີນາ – 1  ເມສາ 2021 ຜ່ານມານີ້, ຄະນະໂຄສະນາອົບຮົມແຂວງຫົວພັນ ໄດ້ປະສານສົມທົບກັບ ຄະນະໂຄສະນາອົບຮົມສູນກາງພັກ ແລະ ຄະນະໂຄສະນາອົບຮົມເມືອງກັວນເປີດຊຸດຝຶກອົບຮົມວຽກງານໂຄສະນາ - ປາຖະກະຖາ ໃຫ້ແກ່ພະນັກງານລັດຖະກອນຢູ່ເມືອງກັວນ, ພະນັກງານເຂດ 10 ເຂດຂອງເມືອງກັວນ ເຊິ່ງພິທີດັ່ງກ່າວໄດ້ເປີດຂື້ນຢ່າງເປັນທາງການ ໃນເວລາ 8 ໂມງເຊົ້າຂອງວັນທີ 30 ມີນາ ປີ 2021 ທີ່ຫ້ອງການກຸ່ມວັດທະນາທໍາເມືອງກັວນ, ພາຍໃຕ້ການເປັນປະທານຂອງ ທ່ານ ອໍາພອນ ສອນວິໄລ ຮອງເລຂາພັກເມືອງ, ຜູ້ປະຈໍການ, ຜູ້ຊີ້ນໍາແນວຄິດ-ທິດ ສະດີຂັ້ນເມືອງ, ທ່ານ ນ. ພາວອນ ສຸກນະວົງ ຫົວໜ້າກົມໂຄສະນາປາຖະກະຖາ, ຄະນະໂຄສະນາອົບຮົມສູນກາງພັກ, ແລະ ທ່ານ ແປ້ນ ໄຊຍະທໍາ ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍບັນດາທ່ານນັກວິທະຍາກອນຈາກສູນກາງ, ແຂວງຈໍານວນ 5 ທ່ານ ແລະ ນັກສໍາມະນາກອນມາຈາກບັນດາຫ້ອງອ້ອມຂ້າງເມືອງຈໍານວນ 33 ທ່ານ, ຍິງ 8 ທ່ານມາຈາກເຂດຈໍານວນ 9 ທ່ານ, ຍິງ  1 ທ່ານ.

ການຝຶກອົບຮົມຄັ້ງນີ້ບັນດານັກວິທະຍາກອນໄດ້ນໍາພາຄົ້ນຄ້ວາເຊື່ອຊຶມ ແລະ ຮັບຟັງການຂື້ນບັນຍາຍເອກະສານ 3 ບົດຂອງນັກວິທະຍາກອນຄື: ບັນຫາພື້ນຖານຂອງວຽກງານໂຄສະນາ, ຄວາມສາມາດໃນການຂີດຂຽນເອກະສານ, ແລະ ສິນລະປະໃນການເວົ້າຂອງນັກປາຖະກະຖາ, ບາງບົດຮຽນໃນການເຄື່ອນໄຫວໂຄສະນາ - ປາຖະກະຖາ ໄດ້ດໍາເນີນມາເປັນເວລາ 3 ວັນເຕັມ. ຜ່ານການຝຶກອົບຮົມເນື້ອໃນເອກະສານ 4 ບົດ ໄດ້ເຮັດໃຫ້ພະນັກງານ - ລັດຖະກອນ ຜູ້ທີ່ໄດ້ເຂົ້າຮ່ວມຝຶກອົບຮົມມີຄວາມຮູ້, ຄວາມເຂົ້າໃຈຢ່າງເລິກເຊິງ ກ່ຽວກັບວຽກງານໂຄສະນາ - ປາຖະກະຖາ ສາມາດເປັນເສ ນາທິການໃຫ້ແກ່ຄະນະພັກ, ອໍານາດການປົກຄອງ ໃນການເຮັດວຽກງານການເມືອງ - ແນວຄິດ ແລະ ມີຄວາມຮູ້ຄວາມສາມາດໃນການຂຽນ, ການເວົ້າໃຫ້ຖຶກຕ້ອງ ແລະ ແທດເໝາະກັບສະພາບຄວາມເປັນຈິ່ງໃນການໂຄສະນາ-ປາຖະກະຖາ,ປຸກລະດົມຂົນຂວາຍໃຫ້ພະນັກງານ - ລັດຖະກອນ ແລະ ປະຊາຊົນບັນດາເຜົ່າໃຫ້ຮັບຮູ້ເຂົ້າໃຈບັນດາແນວທາງ, ແຜນນະໂຍບາຍຂອງພັກ ແລະ ລະບຽບກົດໝາຍຂອງລັດ ພ້ອມທັງຈັດຕັ້ງປະຕິບັດໃຫ້ປະກົດຜົນເປັນຈິງຢູ່ຮາກຖານທ້ອງຖິ່ນນັບມື້ນັບດີຂຶ້ນ.

ກອງປະຊຸມຝຶກອົບຮົມວຽກງານດັ່ງກ່າວໄດ້ປິດລົງຢ່າງເປັນທາງການໃນເວລາ 16 ໂມງ 00 ຂອງວັນທີ 1 ເມສາ 2021.