50. ຄະນະໂຄສະນາອົບຮົມແຂວງຫົວພັນ, ແຂວງຫຼວງພະບາງ ແລະ ຄະນະໂຄສະນາສຶກສາພັກແຂວງເຊີນລາ

ສ້າງຂື້ນເມື່ອ ວັນອັງຄານ, 09 ສິງຫາ 2022 03:48
ຂຽນໂດຍ ນ ຊໍາ

ຄະນະ​ໂຄສະນາ​ອົບຮົມ​ແຂວງ​ຫົວພັນ,  ແຂວງຫຼວງພະບາງ ​ ແລະ ຄະນະ​ໂຄສະນາ​ສຶກສາ​ພັກແຂວງເຊີນລາ

    ໃນ​ລະ​ຫວ່າງວັນ​ທີ 25-28 ກໍລະກົດ 2022  ຜ່ານມານີ້ ຄະນະ​ໂຄສະນາ​ອົບຮົມ​ແຂວງ​ຫົວພັນ​ ແລະ ຫຼວງພະບາງ ໄດ້ໄປເຄື່ອນໄຫວຢ້ຽມຢາມພົບປະແລກປ່ຽນບົດຮຽນກັບຄະນະ​ໂຄສະນາ​ສຶກສາ​ພັກແຂວງ​ເຊີນລາ ໃນເວລາ 9 ໂມງເຊົ້າ​ຂອງວັນ​ທີ 25 ກໍລະກົດ 2022  ຄະນະ​ໂຄສະນາ​ອົບຮົມ​ແຂວງ​ຫົວພັນ​ ໄດ້​ອອກ​ເດີນທາງຈາກແຂວງຫົວພັນໂດຍໄດ້ຜ່ານດ່ານ ບ້ານດ່ານ-ຊຽງເຂືອງ ເມືອງແອດແຂວງ​ຫົວພັນ​ ນໍາ​​ໂດຍ​ສະຫາຍ ​ຕົງລີເຕັ່ງ ກຳມະການພັກແຂວງ, ​ຫົວໜ້າ​ຄະນະ​ໂຄສະນາ​ອົບຮົມ​ແຂວງພ້ອມ​ດ້ວຍຄະນະ​ທິມງານ ທັງໝົດ 10 ສະຫາຍ , ຍີງ 03 ສະຫາຍ, ໂດຍມີການຕ້ອນຮັບຂອງຄະນະໂຄສະນາສຶກສາພັກຂອງແຂວງເຊີນລາຢູ່ດ່ານ ບ້ານດ່ານ-ຊຽງເຂືອງ.

      ວັນທີ່ 26 ກໍລະກົດ 2022 ຄະນະຜູ້ແທນຄະນະໂຄສະນາອົບຮົມ 3 ແຂວງ ຫົວພັນ, ຫຼວງພະບາງ ແລະ ແຂວງເຊີນລາ ໄດ້ລົງຢ້ຽມຢາມ​ບາງຕົວແບບການພັດທະນາເສດຖະກິດ-ສັງຄົມ ຢູ່ເມືອງທວັນເຈົາ ແລະ ໄປໄຕທູບທຽນຢູ່ເຂດທ່ອງທ່ຽວທາງດ້ານວັດທະນາທຳ ແລະ ໄປທ້ອງທ່ຽວຢູ່ເກາະຮູບຫົວໃຈ ຢູ່ເມືອງກຣີງຍາຍ.

       ວັນທີ 27 ກໍລະກົດ 2022 ຄະນະທີມງານ ທັງ 03 ແຂວງໄດ້ເດີນທາງໄປໄຕທູບທຽນຢູ່ວິຫານບູຊາ ປະທານໂຮ່ຈີ່ມິນ ຢູ່ສະໜາມຫຼວງເຕີຍບັກ ນະຄອນເຊີນລາ, ອະນຸສອນສະຖານບັນດານັກຮົບວິລະຊົນ ຢູ່ເຮືອນຄຸກເຊີນລາ, ເຂດຮ່ອງຮອຍປະຫວັດສາດສາມແຍກກໍນອຍ, ຢ້ຽມຢາມຕົວແບບການປູກຟັງ ຢູ່ເມືອງມາຍເຊີນ. ໃນເວລາ 14:00 ໂມງຂອງວັນທີ 27 ກໍລະກົດ ຄະນະທີມງານ 03 ແຂວງ ເຂົ້າຢ້ຽມຂໍ່ານັບການນໍາແຂວງ ແຂວງເຊີນລາ ພ້ອມລາຍງານຈຸດປະສົງຈັດກອງປະຊຸມ, ກອງປະຊຸມພົບປ່ຽນບົດຮຽນ ໄດ້ເປີດຂື້ນໃນເວລາ 14:30 ນາທີ ທີ່ຫ້ອງປະຊຸມເລກ 01 ຂອງສູນກາງຈັດຕັ້ງກອງປະຊຸມ ແຂວງເຊີນລາ ໂດຍການເຂົ້າຮ່ວມຂອງທ່ານ ສະຫາຍ ນ ດິງທິບິກຖ້າວ ຄະນະປະຈໍາພັກແຂວງ ຫົວໜ້າຄະນະໂຄສະນາສຶກສາພັກແຂວງເຊີນລາ, ສະຫາຍ ຕົງລີເຕັງ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງຫົວພັນ ແລະ ສະຫາຍ ທອງຈັນ ພົມມະລັດ ຮອງຫົວໜ້າຄະນະໂຄສະນາອົບຮົມແຂວງຫຼວງພະບາງພ້ອມຄະນະ ແລະ ບັນດາຜູ້ແທນສາມແຂວງ ຫົວພັນ, ຫຼວງພະບາງ, ເຊີນລາເຂົ້າຮ່ວມຈໍານວນ 30 ທ່ານ, ຍີງ 11 ທ່ານ.

     ​ໃນພິທີດັ່ງກ່າວສະຫາຍ ​ນ ດີງທິບິກຖ້າວ ຄະນະ​ປະ​ຈໍາ​ພັກ​ແຂວງ, ຫົວໜ້າ​ຄະນະ​ໂຄສະນາ​ສຶກສາພັກແຂວງເຊີນລາໄດ້ມີຄໍາເຫັນຕ້ອນຮັບ ແລະ ກ່າວເປີດກອງປະຊຸມ ຈາກນັ້ນ ສະຫາຍ ຫງວຽນຢຸຍເລືອງຜ່ານບົດລາຍງານສະພາບການຈັດຕັ້ງປະຕິບັດວຽກງານຂອງຄະນະໂຄສະນາສຶກສາພັກແຂວງເຊີນລາ ຕໍ່ມາ ສະຫາຍ ຕົງລີເຕັ່ງ ກຳມະການແຂວງ ຫົວໜ້າຄະນະໂຄສະນາອົມຮົມແຂວງຫົວພັນ, ຫຼວງພະບາງໄດ້ພັດປ່ຽນກັນຂື້ນລາຍງານການເຄື່ອນໄຫວຂອງໂຄສະນາອົບຮົມ 2 ແຂວງ ຫົວພັນ ແລະ ຫຼວງພະບາງ ໃຫ້ບັນດາຜູ້ແທນທັງສາມຝ່າຍຮັບຊາບ ຄະນະຜູ້ແທນທັງສາມຝ່າຍກໍ່ໄດ້ມີຄໍາເຫັນປຶກສາຫາລື, ແລກ ປ່ຽນບົດຮຽນຕໍ່ກັບບັນດາເນື້ອໃນຕ່າງໆເຊີງກັນ ແລະ ກັນ ​ຜູ້​ແທນ​ທັງ​ 3 ແຂວງກໍ່ເຫັນດີເປັນເອກະພາບ​ ສ້າງ​ບົດ​ບັນທຶກຊ່ວຍຈໍາເຊິ່ງລາຍລະອຽດມີເນື້ອໃນດັ່ງນີ້:

     1.) ສຶບຕໍ່ເພີ່ມທະວີການຊີ້ນໍາວຽກງານໂຄສະນາສຶກສາອົບຮົມໃຫ້ແກ່ປະຊາຊົນ 3 ແຂວງເວົ້າລວມ, ເວົ້າສະເພາະແມ່ນປະຊາຊົນຢູ່ຂົງເຂດຊາຍແດນ ພ້ອມກັນປົກປັກຮັັກສາ ແລະ ເພີ່ມທະວີຄວາມສາມັກຄີມິດຕະພາບພິເສດ ລາວ-ຫວຽດນາມ, ຫົວພັນ-ຫຼວງພະບາງ-ເຊີນລາ ນັບມື້ໄດ້ຮັບການພັດທະນາຂຶ້ນເລື່ອຍໆ.

     2.) ສືບຕໍ່ຮັກສາການຮ່ວມມື ແລະ ພົບປະແລກປ່ຽນບົດຮຽນ 02 ປີ/01 ຄັ້ງ, ໂດຍພັດການເປັນເຈົ້າພາບ, ແຕ່ລະຝ່າຍແຕ່ງຕັ້ງຄະນະທີມງານ ນໍາໂດຍສະຫາຍຫົວໜ້າຄະນະ ຫຼື ຮອງຫົວໜ້າຄະນະ ເປັນຫົວໜ້າຄະນະ ມາຢ້ຽມຢາມ, ແລກປ່ຽນສະພາບການ ແລະ ວາງທິດທາງຮ່ວມມືໃນຊຸມປີຕໍ່ໜ້າ.

     3.) ສືບຕໍ່ປະສານສົມທົບແລກປ່ຽນບົດຮຽນກ່ຽວກັບ ວຽກງານໂຄສະນາສຶກສາອົບຮົມ, ແນວຄິດການເມືອງ ແລະ ບັນດາຂົງເຂດວຽກງານໂຄສະນາສຶກສາ, ໂຄສະນາອົບຮົມ ຂອງແຕ່ລະຝ່າຍ.

        ຕອນ​ທ້າຍ​ກ​ອງປະຊຸມທ່ານ ນ ດິງທິບິກຖ້າວ ໄດ້ມີຄໍາເຫັນໃຫ້ສາມແຂວງພ້ອມກັນສຶກສາອົບຮົມວຽກງານຊາຍແດນ ແລະ ພ້ອມກັນຕັ້ງໜ້າແກ້ໄຂ້ຢ່າງຕັ້ງໜ້າ  ຈາກນັ້ນຄະນະໂຄສະນາອົບຮົມສາມແຂວງໄດ້ພັດປ່ຽນຂຶ້ນມອບຂອງທີ່ລະນຶກໃຫ້ເຊິ່ງກັນ ແລະ ກັນ ດ້ວຍໄມຕິຈິດມິດຕະພາບ ແລະ ຄວາມຮັກແພງ. ກອງປະຊຸມ​ໄດ້​ປິດ​ລົງ​ໃນ​ເວລາ 5:30 ໂມງຂອງວັນດັ່ງກ່າວ. ​

        ​ໃນ​ຕອນ​ເຊົ້າ​ຂອງ​ວັນ​ທີ 28 ກໍລະກົດ ປີ 2022 ຄະນະ​ໂຄສະນາສຶກສາແຂວງເຊີນລາໄດ້ ນໍາສົ່ງ​ຄະນະ​ຜູ້​ແທນ​ໂຄສະນາອົບຮົມແຂວງຫົວພັນ ​ຢູ່​ທີ່​ດ່ານ ບ້ານດ່ານ-ຊຽງເຂືອງ​ ເມືອງແອດ ​ ແຂວງ​ຫົວພັນ​.